( ان لو بتعاني من ارتفاع الكوليستيرول في الدم ، يبقى حضرتك لازم تقلل من الأكل اللي بيتعمل بالزبدة البلدي ، ولازم تاكل أكل معمول بسمن نباتي اللي بينتج من أي زيت خفيف زي عباد الشمس وزيت لب النخيل المهدرج والذرة )

مبدأيا المعلومة دي غلط

الصح أن الزيوت ( اللي بيتعمل منها السمن النباتي ) دي عبارة عن زيوت نباتية مهدرجة طبعا مش كلة .وهنعرف الأنواع الحلوة طب لازم نفهم يعني أيه مهدرجة ....

يعني بالبلدي كدا ياخدوا الزيت النباتي بعد ما يستخلصوه ، يسخنوه لحد ما توصل درجة حرارة عالية ، ويروحوا مهدرجينه و مشبعينه بغاز الهيدروجين لحد ما يحصله تشبع ، و بعدين يضيفوا بعض المعادن عليه زي النيكل عشان يسرعوا التفاعل ، وبكده يتحول من صورة سايلة لصلبة أو شبه صلبة

طيب وأيه الخطر هنا

الخطر اننا قضينا علي الفيتامينات ومضادات الأكسدة والدهون المشبعة اللي في الزيت النباتي الطبيعي المستخلص و أصبح الزيت دا بيعرض جسمك لبلاوي سودا كتير زي أمراض القلب والشرايين والسكر وارتفاع ضغط الدم طبعا بالاستعمال علي مدي طويل ..و معظمنا بنستعمله للاسف

 طيب الزبدة البلدي 

" أي حاجة من مصدر حيواني طبيعي خدها وأنت مطمن "طالما من حيوان سليم ومعافي

يعني الزبدة البلدي صحية جدا ولها فوائد كتير جداااا

اه دي حقيقة بس مش بافراط وبالتزامي بحالتي الصحية والكميات المتاحة لي حتى الشحوم والدهون بتاعة اللحوم برضو صحية جدا لكن كل حاجة بالمقدار الطبيعي من غير أفورة

 طب أيه حكاية الكوليستيرول 

الكوليستيرول مش هو الشحوم والربط ما بينهم خطأ برضو لأن الكوليستيرول موجود في كل خلية في الجسم و مشكلته هو زيادته في الدم

وفي منه ضار ومنه نافع

 Hdl & ldl (high and low density lipoprotein) يعني في كوليستيرول بيفيد جسمك..مش كل خطر و مضر